آي منيم دوستاغ اولان ديلده ديليم
آي منيم عؤمره سورن چؤلده ديليم
يئددي مين ايل باش اولان هر ديلدن
سَكسن ايل يارپاغ آتان يئلده ديليم
آي منيم ماوي سمالرده گزن
سونرا نيسگيل قاييدان ائلده ديليم
آي منيم عشقه دولان خان چوبانيم
آي منيم درده باتان سئلده ديليم
ساييروغ يئدديجه لر آيلار اولور
باتيريب ياغي سني ايلده ديليم
مئشه ده،باغدا،گولوستاندا اوچان
كپنك ساني قونان گولده ديليم
سني قوندارما آدا باغلاديلار
آي منيم هي دولانان الده ديليم
نه يازيم من داها بو آغ واراغا
ياشا سن،تكجه ياشا ائلده ديليم
نازلي شيرين ديل واريم ، اؤزگه ديله يازمارام
دوغراسالاردا مني اؤز ديليمي آتمارام
جنتي وئرسز منه ، دونياني ساتساز منه
من آنامين ناز ديلين باشقا ديله ساتمارام
شهرياريم دوز دييب قاتما ديلين ديللره
من بو گوزل تورك ديلين آيري ديله قاتمارام
باخ بو ديلين سايه سي ، گزدي آديم ديللره
اولماسا گر بو ديليم هئچ يئره من چاتمارام
اوندا كي من اولموشم قورلايين اوز يوردوما
چون بودور عادت منيم اؤزگه يئره ياتمارام
قبريمين اوستونده سيز توركي بو شعري يازين
اوز ديليمي آتمارام ، باشقا ديله ساتمارام
ملت نئجه تاراج اولور- اولسون، نه ايشيم وار؟!
دشمنلره محتاج اولور- اولسون، نه ايشيم وار؟!
قوي من توخ اولوم،اوزگه لر ايله نه دي كاريم!
دنيا و جهان آج اولور- اولسون، نه ايشيم وار؟!
سس سالما ،ياتانلار آييلار، قوي هله ياتسين،
ياتميشلاري راضي دگلم كيمسه اوياتسون،
تك تك آييلان وارسه حق داديمه چاتسين،
من سالم اولوم، جمله جهان باتسه ده باتسون،
ملت نئجه تاراج اولور- اولسون، نه ايشيم وار؟!
دشمنلره محتاج اولور- اولسون، نه ايشيم وار؟!
سالما ياديما صحبت تاريخ جهاني،
ايام سلفدن دءمه سوز بيرده ، فلاني،
حال ايسه گتور ميل ايليوم دولماني ،ناني
مستقبلي گورمك نه گرك،عمردي فانيف
ملت نئجه تاراج اولور- اولسون، نه ايشيم وار؟!
دشمنلره محتاج اولور- اولسون، نه ايشيم وار؟!
اولاد وطن قوي هله آواره دولانسون،
چركاب سفالته الي،باشي بولانسون،
دول عورت ايسه سائله اولسون،اوده يانسون،
آنجاق منيم آوازهء شانم اوجالسون،
ملت نئجه تاراج اولور- اولسون، نه ايشيم وار؟!
دشمنلره محتاج اولور- اولسون، نه ايشيم وار؟!
هر ملت ادير صفحه ء دنيا ده ترقي،
ايلر هره بير منزل و مآوادا ترقي،
يورغان دوشه گمده دوشه گر ياده ترقي،
بيز ده ادريك عالم روياده ترقي،
ملت نئجه تاراج اولور- اولسون، نه ايشيم وار؟!
دشمنلره محتاج اولور- اولسون، نه ايشيم وار؟!
دديلر سانكي منه پان توركم
من دديم سهو اله ديز خان توركم
اليمين دوشمانينا اوخ سوونگي
اليمين دوستونا من جان توركم
شانلي تاريخيم اولوپ گچميشده
اليه ن دونياني حيران توركم
گون به گون شانيم اوجالماقدادي چون
شانلي دورانه گيرن شان توركم
منه جان جان دييه نه جان جان تورك
منه قان قان دييه نه قان توركم
داييم اينسانليق اولوپ آماليم
اينسانا سايقيلي اينسان توركم
دده مين اوغلويام ايلكين گوندن
دده مي من تانيدان توركم
منه يولسوز دمه سين يولسوزلار
يولوم آيديندي من اعيان توركم
بير گون اولدوم سومر بير گون ماد
من اورارتور ايله مهران توركم
بير گون ايران دا من اولدوم مدني
ماننايام قوتييم اشكان توركم
ايسلامين بير زامان اولدوم قيليجي
ايسلاما جارچي موسلمان توركم
منه يولسوز دييه نه ذولفقارام
سالارام مولكونه طوفان توركم
سلجوقام غزنويم من صفوي
افشارام درك اله شيروان توركم
پارچا پارچا اولور آذربايجان
سانكي من بوردا سيخيلقان توركم
خوراساندان قوما ، قومدان خليجه
ايصفاهان شوش طبريستان توركم
لوت كويرينده سوسوز قالسامدا
بير ياشيل ئولكه ده گيلان توركم
كيرمان اولموشدي منه تورك وطني
چارماحال ايله خوزيستان توركم
باخ تنگيستانين اوغلانلارينا
باخ خزر ساحيلي توركمان توركم
گيروه كورديستانا پاي اولموشسا
آتمارام قزويني تهران توركم
ايندي ياد اوغلي منه ياد دمه سين
گوزي گورسين بوتون ايران توركم
تولكي اسلان ايله گيرمز ساواشا
گري دورسون كي من اسلان توركم
بير قيغيلجيم اونا اود پوسگورسم
دودماني گدر آسان توركم
عاقيل اينسان كي دولاشماز توركه
يوخسا من يوردونا وولكان توركم
وطنيم ياد لارا يورد اولمياجاق
وطنيم ايچره خورامان توركم
يوردومون توپراقينا گوز تيكني
ايله ين گونده هراسان توركم
وطنيمدير وطنيمدير وطنيم
وطنيم آذربايجان توركم
اي قلم سوزلَرين دَه اَثريوخ
آشنا دَن مَنَه بيرخَبَر يوخ
گَلدي بو جومعَه دَ گِشدي آلله
فاطمَه يوسيفينَّن خبر يوخ
ياندي پروانَه لَرشمعِ سوندي
آيريليقدان اورَه قانَه دوندي
شَأنيدَه رُتبَه دَه بي بَدَل سَن
هرگوزَل دَن آقا سَن گوزَل سَن
كيم ديير آيريليق در دَه سال ماز؟
عاشيقين صبريني اَل دَن آلماز؟
اي گوزوم يول لارا باخ داريخما
گون هميشَه بولوت آت دا، قالماز
قونچَه گول لَر نَه اندازَه سُل سون
قلبيلَر قويما قانيلَه دُلسون
گَلدي بو جُمعَه دَه گَلمَدين سَن
گون سايِم جمعه ي ديگَر اولسون
اي "صفايي" هَلَه دُز فراقه
يول سالاخ بيزدَه بيردَه عراقَه
قلبيلَر غُصَّه دَن داغلي قالدي
يا امام زمان گَل اَمان دي
كربلا يول لاري باغلي قالدي
شجاع الدين صفري (صفائي)
ياشا ياشا اي قهرمان،تبريزيم
اي اودلارا دائم يانان، تبريزيم
تاريخ بويي،آزادليقين يولوندا
زحمت چكوب جان يانديران، تبريزيم
باقرخان تك ايگيت لرين مسكني
سن بسله دون ستارخان،تبريزيم
واردور سنون، حيدرخان تك شئرلرين
داغلاريندا گزر،اصلان،تبريزيم
استبدادين قول قانادين سينديريب
علي مسيو، حسين باغوان،تبريزيم
اوغلانلارين خياباني، اراني
بهرنگيه اولدون مكان،تبريزيم
يوزلر،مين لر،فدائي لر ،سنون دور
هربيري، بير شير ژيان،تبريزيم
آدين، سانين ،هر ديارا ياييلوب
عالم سنه اولموش حيران،تبريزيم
الهام آلير سندن بوتون ئولكه ميز
ايگيت لرين يوردي اولان،تبريزيم
سوندرنمزدوشمن سنين اودووي
سيننده، مين آتشفشان ،تبريزيم
****
اصلان كيمي، دوردون گينه اياغا
جبهه لرده،ائتدين جولان،تبريزيم
چكد ين گويه،ستارخانلار بايراغين
ظلمه قارشي،ائتدين عصيان،تبريزيم
سالدين قورخي،دشمنلرين جانينا
جانيم اولسون سنه قربان،تبريزيم
اراده وي، قدرتوي، شانيوي
دشمنلره وئردون نشان،تبريزيم
قان توكولدي ديواريندان داشين دان
دعوا گوني، اي قوجامان،تبريزيم
آخدي قانين، كوچه لرده،سئل تكين
ئوز قانيوا، اولدون غلطان،تبريزيم
دسته دسته ايگيت لرين، ئولدولر
باغرين اولدي غم دن القان،تبريزيم
شهيد لرين قاني، يره توكولموش
باش گوزوندن قاني آخان، تبريزيم
دوشمن بيزيم بو ائل لري ازنمز
توكولسه ده، مين لرجه قان،تبريزيم
سلام اولسون قورخي بيلمز ائليوه
آنا يوردوم، اي قهرمان، تبريزيم
دوشمنلردن ،ائل انتقام آلاجاق
قالميه جاق يرده بو قان،تبريزيم
****
شانلي وطن، اي آلولارئولكه سي
اي سوگليم،اي مهربان ،تبريزيم
سنگرلرده،دويوشلرده،جبهه ده
داغلار كيمين ،محكم دايان، تبريزيم
گونش تكين ايشيقلاندر ائل يولون
چراغ اولوب هرياندا، يان، تبريزيم
اسارتين زنجيرلرين قيرگيلن
دشمنلره وئرمه امان،تبريزيم
آلچاقلاردان،قولدورلاردان،قوردلاردان
قويما قالا بيرده نشان،تبريزيم
****
بيرگون گلر، قارا گونون قورتولار
اوزون گولر، اولار خندان،تبريزيم
اسارتين زنجيرلري قيريلار
آزاد ياشار هر بير انسان،تبريزيم
ظالم لرين تفاق لاري ،داغيلار
ظلمين ائوي، اولار ويران،تبريزيم
گل لر آچار چمن لر ده،باغلاردا
بولبول لرين اوخور الحان،تبريزيم
لاله بيتر شهيدلرين قانين نان
هريان اولار بير گلستان،تبريزيم
حسنون گؤزل آيت لري اي سئوگلي جانان
اولموش بوتون عالمده سنين شانينه شايان
گل ائيله عنايت منه وئر بوسه لبيندن
چونكي گؤزلين بوسه سيدير عاشيقه احسان
سوردوم كي كؤنول هاردادي آلديم بو جوابي
هئچ سورما تاپيلماز اونو آختارسادا انسان
رحم ائيله دئييب سيل كيمي گؤز ياشيمي تؤكدوم
گل قانيمله اَل يوما اي آفت دوران
انصافين اگر اولسا آچيق سؤيله «نظامي»
سنله نئجه رفتار ائلسين اي مهي تابان
گل سؤيله جوابين نه اولار سورغو زماني
احواليمي سندن سوروشارسا قيزيل اسلان
آي
يار! محبّتين منه وار مختصر، يا يوْخ؟
هردن بو عاشقه ائدهجكسن نظر، يا يوْخ؟
اوّل گلهنده، بير ايل «آقا» سؤيلهدين منه
سوْنرا، اوْتوز اوچ ايل ائلهييبسن «نؤكر»، يا يوْخ؟
يوْخ اؤلكهده هُنرليلره اعتبار وئرهن
رخصت وئريرسن ائوده اوْلوم مُعتبر، يا يوْخ؟
پول يوْخ، مقامدا يوْخ، بيزه وار تكجه «افتخار»!
منده اوْلوم بو باشچيلارا «موفته خر» يا يوْخ؟
دؤنسه اليمدهكي قلمين جؤوهري ياغا
دستمال اوْلا كاغيذ، اوْلارام بختهور، يا يوْخ؟
يالتاقليق ائلهيم، چاليشيب، مدحلر يازام
اوْندا، مقاماتين خوْشو مندن گلهر، يا يوخ؟
يوز اللي دفعه بير پروژه افتتاح اوْلا
«تبريز» آبادلانيب، اوْلاجاق بير شههر، يا يوْخ؟
محكم ياپيشسا صندلييه «شهر شوراسي»
ديبده بو شهر پاريسه يوزمين دگر، يا يوْخ؟
يوز ايل آچاق آغيز دُعايا، گؤز تيكهك يوْلا
«مئترو»- يلا ديبده ائيلهيهريك بير سفر، يا يوْخ؟
باخ، «اورميه گؤلو» قورويور، سوْن نفسده دير
مسؤوللارا چاتيب گؤرهسن بير خبر، يا يوْخ؟
بوْش سؤزلري بوراخ- بالا!- گل، ازدواج ائدك
دؤولت، بيزه گؤر اوْندا كلان وام وئرهر، يا يوْخ؟
كؤكدن سوادسيز اوْلسادا بَي، هم گلين خانيم
دانشگاها، گؤر ازدواجايله گيرهر، يا يوْخ؟
بير ائولهنن كيشي، گئنهده ائولنه بيلر
خوْشبخت اوْلار بو قانون ايلن هر بشر، يا يوْخ؟
مستأجر، همده ايشسيزيك، آنجاق گل ائولهنك
قانون بيلركي، وار بئله ايشده ضرر، يا يوْخ؟
تنقيدله طنز يازدين- آي «آرش»- عؤمور بوْيو
دوز سؤيله- قارداش!- عؤمرون اوْلوبدور هَدَر، يا يوْخ؟
Şaeir :Həmid_Arəş azad
وطن اي قانلي چيچك له
بويانان
آجي تاريخ
بويو هئي تاپدالانان
بؤلونن مين
يئره مين پارچالانان
سن
بؤلونموش اؤره ييم سن وطنيم
كسيله ن
جؤت بيله ييم سن وطنيم
******
آييمين هر گؤنو مين ايلدن
آغير
كؤر بولوتدان قارا گؤنلردي ياغير
آي كوراوغلو داها چوخ ياتما باغير
باش آياق اودسوز آلوودور وطنيم
قارا بايقوشلو كالودور وطنيم
******
كؤت پيچاقلار يئنه ميدان سولايير
قوروموش
باخچادا ايت قان يالايير
جاناوارلار
گئجه او او اولايير
قالانيب
بوز تولادان خان وطنيم
بو قيزيل
تورپاغي آلقان وطنيم