گئديرسيز مكه يه تكميل اولا ايمان حاجيلار؟
وئره آللاه سيزه ده حوري و قلمان حاجيلار؟
فيكر ائديرسيز كي قيامت ده ده وار خر تو خري
آقا وقتين اولاجاق هر كين تاج سري
آلاجاق دور و برين حوري و قلمان و پري ؟
وئره جكلر سيزه ده روضه رضوان حاجيلار؟
گئديرسيز مكه يه بو ملتي آلداتماق اوچون
اوزادا ساققاليزي جينسي باهالاتماق اوچون
ياكي شيطان كيشي لر شيطانا داش آتماق اوچون
شيطاني وورماگينان كوهنه مسلمان حاجيلار
*
هئچ اولوب بير گئجه سيز باش چكه سيز قونشولارا
گؤره سيز قونشونون آروادي عجب گييدي قارا
اري بيچاره آجيندان اؤزونو چكدي دارا
سيز دوغوردان حاجي سيز يا كي يالاندان حاجيلار؟
*
گر پولون چوخدو كيشي وئرگينن آجلاري دويور
گؤرموسن دولت الان مين ديلينن خالقي سويور
بيزي بيچاره ائديب سيزلري آواره قويور
بو نه ياتماقدي ياتيبسيز سيزي قرآن حاجيلار؟
*
گاه گئديرسيز وئريسيز كربلادا صداما پول
ائله بير كره مكاندا ساليسيز ائششه يه چول
من اؤلوم كيمدي قويان جنگ ده آروادلاري دول
يا گؤرن بيز دئييريك صداما بهتان حاجي لار؟
*
قاراگونلر گرك هر يئرده وار ايرانه گله؟
نييه قويموللار بو ايران سر و سامانه گله؟
هئچ گؤروبسوز سيز عربلر ده خراسانه گله؟
او شه كرب و بلادير بو خراسان حاجيلار
*
خراسان شاهينه يوخ فرقي امام حسينين
يوخ امام ائيله امام دير بو منيم دير او سنين؟
قولو سينسين گؤروم آللاه بئله قانون كسه نين
سيزه ديوان ائله سين شاه شهيدان حاجي لار
*
سيزه آللاه دئييب آج قوي بيزي پول وئر عربه
ييغ آپار وار يوخووي وئرگينن او بي ادبه
ائيله بير يول وار عزيزيم يولووي سال حلبه
گرر آجيندان نه چكير اوردا نريمان حاجي لار
*
جفر آباددا الان ملت آجيندان قيريلير
قيرميزي باشماق اوچون بير جوت اوشاقلار ويريلير
پولي چوخلاري يئييب ملتين حاققين جيريلير
چوخو تاپمير گييه تا اينينه تومان حاجيلار
*
هله قوي كئيف ائله سين مكه ده استانداريميز
ياخشي ماهردي شعار وئرمه يه فرمانداريميز
ياري ميز خواب جهالتده دير قالدي ياريميز
ياريميزدا اوره يي غمدن اولوب قان حاجي لار
*
زنگان آباد اولا ويران اولا استاندارا نه
خان خوله جر جهنم كيشي فرماندارا نه
چوخ گناه بيزده دي بو بي گناه انسانلارا نه
بولارا نه كي اولوب ات نئچه توامن حاجيلار
*
كيشي بونلار گليب استانه كي تا كئيف ائله سين
باهادي تاكسي چؤرك قارداس ، حسن بورج ائله سين
گليب هر كس بورا بو شهرده بير پول كوره سين
خالقي آلداتماغادي بير بئله احسان حاجيلار
*
سؤز اولور حضرت استاندار اولور كوهه روان
يئيه صبحانه ، سونا ائيليه تفريح كنان
ساهات اون بيرده گلير دفترينه مرد جوان
يئتيشير وقت اذان باغلانير هر يان حاجيلار
ايشه واخ قالميري ساكي سيزه قربان حاجيلار
*
كس سسين شاعر بدبخت قوتار سؤزلريوي
يوخوسوزلوق چيخادار صبحه كيمي گؤزلريوي
گئده زنگاني ياتيب سن دؤيوسن ديزلريوي؟
دردي فرهنگ دي اولماز بونا درمان حاجيلار
بو بلاگ يازيرام كي آذربايجانين اصيل شعر و سوزلرين گوزه چكم و ياددان چيخان سوزلري يادا سالام من تجزيه طلب دئرم من اوز مملكتيمه سؤيرم اما بو مملكتين باشين هر يرنينن چوخراخ سؤيرم