بؤلوم : صابير
۱۴ تير ۱۳۹۰     یازار : اميرخان آذربايجاني

ملت نئجه تاراج اولور- اولسون، نه ايشيم وار؟!
دشمنلره محتاج اولور- اولسون، نه ايشيم وار؟!

قوي من توخ اولوم،اوزگه لر ايله نه دي كاريم!
دنيا و جهان آج اولور- اولسون، نه ايشيم وار؟!


سس سالما ،ياتانلار آييلار، قوي هله ياتسين،
ياتميشلاري راضي دگلم كيمسه اوياتسون،

تك تك آييلان وارسه حق داديمه چاتسين،
من سالم اولوم، جمله جهان باتسه ده باتسون،

ملت نئجه تاراج اولور- اولسون، نه ايشيم وار؟!
دشمنلره محتاج اولور- اولسون، نه ايشيم وار؟!


سالما ياديما صحبت تاريخ جهاني،
ايام سلفدن دءمه سوز بيرده ، فلاني،

حال ايسه گتور ميل ايليوم دولماني ،ناني
مستقبلي گورمك نه گرك،عمردي فانيف

ملت نئجه تاراج اولور- اولسون، نه ايشيم وار؟!
دشمنلره محتاج اولور- اولسون، نه ايشيم وار؟!


اولاد وطن قوي هله آواره دولانسون،
چركاب سفالته الي،باشي بولانسون،

دول عورت ايسه سائله اولسون،اوده يانسون،
آنجاق منيم آوازهء شانم اوجالسون،

ملت نئجه تاراج اولور- اولسون، نه ايشيم وار؟!
دشمنلره محتاج اولور- اولسون، نه ايشيم وار؟!

 

هر ملت ادير صفحه ء دنيا ده ترقي،
ايلر هره بير منزل و مآوادا ترقي،

يورغان دوشه گمده دوشه گر ياده ترقي،
بيز ده ادريك عالم روياده ترقي،

ملت نئجه تاراج اولور- اولسون، نه ايشيم وار؟!
دشمنلره محتاج اولور- اولسون، نه ايشيم وار؟!