وطن اي قانلي چيچك له بويانان

آجي تاريخ بويو هئي تاپدالانان

بؤلونن مين يئره مين پارچالانان

سن بؤلونموش اؤره ييم سن وطنيم

كسيله ن جؤت بيله ييم سن وطنيم

******

آييمين هر گؤنو مين ايلدن آغير

كؤر بولوتدان قارا گؤنلردي ياغير

آي كوراوغلو داها چوخ ياتما باغير

باش آياق اودسوز آلوودور وطنيم

قارا بايقوشلو كالودور وطنيم

******

كؤت پيچاقلار يئنه ميدان سولايير

قوروموش باخچادا ايت قان يالايير

جاناوارلار گئجه او او اولايير

قالانيب بوز تولادان خان وطنيم

بو قيزيل تورپاغي آلقان وطنيم

گوزومه سحرده چالان گونش/ گوزليم قارادي سن اولماسان

 

بئله باخما ظاهير اوزوم گولش/ اوره گيم يارادي سن اولماسان

 

قيناما مني او خومار گوزه/ من ازل باخاندا وروولموشام

 

اوز اوزومله سويله يرم هر گئجه/ بوعمور فنادي سن اولماسان

 

گئجه لر آغيردي ياتانميرم/ سني خاطيريمدن آتانميرم

 

بيلميرم بو عشقيمين آخيري/ باشيما بلادي سن اولماسان

 

گئديرم دايان دانيشيم گئديم/ يانيرام دانيش آليشيم گئديم

 

هاني كاروان قاريشيم گئديم/ بورا غم سرادي سن اولما سان

 

گئجه اود توتور آليشير اوره ك/ داياناندا من دانيشير اوره ك

 

چاپالير اسير چاليشير اوره ك/ ايشيم آه و واي دي سن اولماسان

 

وورولوب اودم اوره گيم سنه / ياشايش جهنم اولوب منه

 

مني گر بهشته ده سالسالار / يئنه يوخدو دادي سن اولما سان

 

دئمه آشنالر آتيب مني/ يادا ايشگيمنده ساتيب مني

 

منه كيم وفا گر ائيله يير / ائله بيل جفادي سن اولماسان

 

 سولاندا گوللريم دييه رديم بيركسيم گلسين

بهار عومرومي خزانلا گئتمه گين گورسين

گوزوم هئي قالدي يولدا يامان گونده تك اولدوم

فلكدن شاكييم چوخ اونوندا چرخي چونسين

گولين رنگي سولاندا قوجالدار باغباني

جوانليق بير گوليدي كيم ايستردي سارالسين

دييه للر شمع ياناندا گئدر پروانه حالدان

يانار عشقين اوتوندا محبت ريشه لنسين

يازيق بيچاره ليلي قاليب نامرد الينده

گزير چوللرده مجنون بوعشقين چاره سين بيلسين

اولوب نامرده محتاج ايگيت لردن خبر يوخ

كيمين امميدي واردي بوهجراننان قوتارسين

يازيلميش سرنوشتين مگر تعبيري وار ميش

اجلدن يولداش اولماز ئولن بيچاره قوي ئولسين

قيريلدي دوز بشرلر گوز آشدي فتنه شرلر

چكير انساني بنده محبت شمعي سونسين

مروت دن خبر يوخ عداوت ريشه آتدي

يئرين سالدي اوره كده قرانليق كولگه سالسين

اولوب غم خانه دنيا قاليبسان بي خبر "زاهد"

اميدلردن خبر وئر اوره كدن غم چكيلسين

شعر : زعفر نظرزاده (زاهد)

اذن وئر توي گئجه سي من ده سنه دايه گليم
ال قاتاندا سنه مشاطه تماشايه گليم

سن بو مهتاب گئجه سي سيره چيخان بير سرو اول
اذن وئر من ده دالونجا سورونوب سايه گليم

منه ده باخدين او شهلا گوزوله من قارا گون
جراتيم اولمادي بير كلمه تمنايه گليم

من جهنمده ده باش ياسديقا قويسام سنيله
هئچ آييلمام كي دوروب جنت ماوايه گليم

ننه قارنيندا دا سنله اكيز اولسايديم اگر
ايسته مزديم دوغولوب بير ده بو دونيايه گليم

سن ياتيب جنتي روياده گورنده گئجه لر
منده جنتده قوش اوللام كي او رويايه گليم

قيتليغ ايللر ياغيشي تك قورويوب گوز ياشيميز
كوي عشقونده گرك بيرده مصلايه گليم

سنده صحرايه مارال لار كيمي بير چيخ نولي كي-
منده بير صيده چيخانلار كيمي صحرايه گليم

آللاهوندان سن اگر قوخميوب اولسان ترسا
قورخورام منده دؤنوب دين مسيحايه گليم

شيخ صنعان كيمي دونقوز اوتاريب ايللرجه
سني بير گورمك ايچون معبد ترسايه گليم

يوخ صنم! آنلاماديم، آنلاماديم حاشا من
بوراخيم مسجديمي سنله كليسايه گليم!

گل چيخاق طور تجلايه سن اول جلوه طور
منده موسي كيمي اول طوره تجلايه گليم

شيردير((شهريار))ين شعري الينده شمشير
كيم ديئر من بئله بير شيريله دعوايه گليم؟!

باده وئر قوي قالديريم انسانليغين معناسينا

ساقيا دولدور ايچيم  بو ساغليغا  پيمانه ني

ذوقو يوخدور شاهلارين بزمينده شمع اولماقليغين

خوش او شمعين حالينا ائتسين ايشيق ويرانه ني

نازلي معشوقه اودور كي عاشقه ناز ائيله سين

شمع رخساري ايله آنجاق ياخماسين پروانه ني

باش فدادير اؤلكه مه جانيم دا قوربان خلقيمه

قويمارام يوردوم دا گزسين هئچ زامان بيگانه ني

جان فداليك ائيله ديم جانان يولوندا عاقبت

آمما  گوردوم چوخ  وفاسيز دلبر جانانه ني

 

سن  ياريمين قاصدي سن              اگلش   سنه   چاي   دئميشم

خياليني   گوندريب    دي              بسكه  من  آخ  واي  دئميشم

آخ! گئجه لر ياتماميشام              من  سنه  لاي_لاي  دئميشم

سن  ياتالي   من  گوزومه             اولدوز  لاري  ساي  دئميشم

هر كس  سنه اولدوز دئيه             ئوزوم    سنه    آي   دئميشم

سندن   سونرا  حياته  من             شيرين   ديسه  زاي  دئميشم

هر گوزلدن بير گول آليب             سن   گوزه له   پاي  دئميشم

سنين  گون تك باتماغيوي              آي    باتانا    تاي    دئميشم

ايندي   يايا   قيش  دئييرم              سابق    قيشا   ياي   دئميشم

گاه طويووي  ياده ساليب              من ده لي ناي _ناي دئميشم

سونرا   يئنه  ياسه باتيب              آغلاري   هاي هاي  دئميشم

اتك   دولي    دريا  كيمي               گوز   ياشيما  چاي  دئميشم

عمره سورن من قره گون                 آخ   دئميشم  واي   دئميشم   

 

زينب زينب زينب كنز حيا زينب كان وفا زينب
زينب زينب زينب درد آشينا زينب غرق بلا زينب
غم قهرماني زهرا نيشاني
اي روح با ايمان جانيم سنه قوربان
زينب زينب زينب سرگشته دوران آواره طوفان
زينب زينب زينب حفظ عهد و پيمان شير شه مردان
زينب زينب زينب محبوبه جانان قرآنينه قوربان
زينب زينب زينب كنز حيا زينب كان وفا زينب
زينب زينب زينب درد آشينا زينب غرق بلا زينب
غم قهرماني زهرا نيشاني
اي روح با ايمان جانيم سنه قوربان
زينب زينب زينب شمشير دو پهلو دان برنده بيان زينب
زينب زينب زينب قارداش باشونين اوستونده زولفي آراران زينب
زينب زينب زينب صحراي مصيبت ده غمنن قوجالان زينب
زينب زينب زينب قارداش باشونين قاني زولفينده حنا زينب
زينب زينب زينب پيمان حَقَ مظهر قرآنه او لان ياور
زينب زينب زينب حجب و ادبه مظهر شأن و شرف منبر
زينب زينب زينب دائم گوزي قان ياشلي باشينده قارا معجر
زينب زينب زينب زهراسي اولن گوندن آماج بلا زينب
زينب زينب زينب تعبير رسا زينب تسبيح خدا زينب
زينب زينب زينب محراب عبادت ده تفسير دعا زينب
زينب زينب زينب پروندۀ خونين شاه شهدا زينب
زينب زينب زينب محكم سوزي اوستونده مردانه دوران زينب
زينب زينب زينب كاخ ستم و ظلمي قل باغلي يخان زينب
زينب زينب زينب چوخ قمچي دگن باشي محمل ده ياران زينب
زينب زينب زينب يولّاردا پرستاري حبُ الاُسرا زينب
زينب زينب زينب سر قافله نهضت اوز نهضتنه قيمت
زينب زينب زينب اولّ ده گورن عزت آخرده چكن ذلت
زينب زينب زينب آغلار گزي غربتده قارداشلارونا حسرت
زينب زينب زينب جان سينه ده سوئلرده واي بخته قرا زينب
زينب زينب زينب هم نايب زهرايه هم ديننه پيرايه
زينب زينب زينب آقزوندا شيرين سوزلر غمنن دولانان وايه
زينب زينب زينب ايستكلي رقيه يينن قبري اولان همسايه
زينب زينب زينب هيچ گور ميين عمرينده بير لحظه صفا
زينب زينب زينب زينب جان نقدنه دين اوسته ارزان ورن زينب
زينب زينب زينب غربت ده اولن يالقوز محتاج كفن زينب
زينب زينب زينب كنز حيا زينب كان وفا زينب
زينب زينب زينب درد آشينا زينب غرق بلا زينب
غم قهرماني زهرا نيشاني اي روح با ايمان جانيم سنه قوربان 

لينك دانلود

http://www.4shared.com/file/178997371/777ce025/Muezinzade.html

اويان اذربايجان اويان



كونلوم قوشو قاناد چالماز، سنسيز بير آن آزربايجان

خوش گونلرين گئتمير مودام خياليمدان آزربايجان

سن دن اوزاق دوشسم ده من عشق اينله ياشاييرام

يارالانميش قلبيم كيمي قلبي ويران آزربايجان

بوتون دونيا بيلير قودرتينله دؤولتينله

آباد اولوب، آزاد اولوب، مولكو ايران، آزربايجان

بيسوتوني، اينقيلابدا شيرين وطن اوچون فرهاد

كولونگ وورموش اوز باشينا زامان – زامان آزربايجان

وطن عشقي مكتبينده جان وئرمه يي اؤيرنميشيك

اوستاديميز دئميش هئچدير وطنسيز جان آزربايجان

قورتارماق اوچون ظاليملرين الين دن ري شومشاديني

اؤز شومشادين باشدان – باشا اولوب آل قان آزربايجان

يا رب نه­ دير بير بو قدر اوركلري قان ائتمه يين

قولو باغلي قالاجاقدير نه واختاجان آزربايجان

ايگيدلرين ايران اوچون شهيد اولموش عوضينده

درد آلميسان غم آلميسان سن ايراندان آزربايجان

ائولادلارين نه واختاجان تّركي وطن اولاجاقدير

ال – اله وئر عصيان ائله اويان اويان آزربايجان

يئتر فراق اودلاريندان اود الندي باشيميزا

دور آياغا يا آزاد اول يا تامام يان آزربايجان

شهرييارين اوره­ يي ده سنين كي تك ياراليبدير

آزادليقدير سنه مرحم منه درمان آزربايجان!

بوزا يازميشدي قيز اوغلانلي بيزيم حاققيميزي

اريدير بير بئييني قانلي بيزيم حاققيميزي

پايلايير تك كوللارا يارپاقلاريمي

ديلي ، آغزي ، الي قرآنلي بيزيم حاققيميزي

گؤردوگون اوتدو ، دماوند قيميللانمادي هئچ

يئنه اوتماز دئدي ايرانلي ، بيزيم حاققيميزي

نييه گؤيلرده بولوددان ال آتيب آلميرسان

ساوالان اي باشي طوفانلي بيزيم حاققيميزي

دوتوبان نيسگيل اليندن دئدي خرمنلره باخ

سووورور گؤ نئجه سهمانلي بيزيم حاقيميزي

ال آتيب ايندي قلمدن غزل ايستير دفتر

اورداكي دانديلا ديوانلي بيزيم حاققيميزي

قويمايين بارماغي حسرت قالا بال بارداغينا

ياخمايين كوللارا شان- شانلي بيزيم حاققيميزي

گئجه بير پالچيقا باتميش كوچه دن سس گلدي

كورلادين آي كدر ايمانلي بيزيم حاققيميزي

كتده بير هيسلي دام التدا بويو عنبرچه قادين

ائله سؤيلوردو ياريم جانلي بيزيم حاققيميزي

استاد هوشنگ جعفري

من دئميرم اوستون نژاددانام من

دئميرم ائللريم ائللردن باشدير

منيم مسلكيمده، منيم يولومدا

 ملت لر هاميسي دوستدور قارداشدير

چاپماق ايسته ميرم من هئچ ميللتي

نه ديلين، نه يوردون ،نه ده امگين

تحقيرائله ميرم ،هده له ميرم

كئچميشين، ايندي سين،يا گله جگين

من آييرميرام، آيري سالميرام

قارداشي قارداشدان، آروادي اردن

آناني بالادان، اتي ديرناقدان

اوره گي اوره كدن، قانادي پردن

پوزماق ايسته ميرم من بيرليك لري

انسانليق بيرليگي ايده آليم دير

قارداشليق، يولداشليق، ادبي باريش

دونيادا ان بويوك آرزولاريمدير

آنجاق بيرسوزوم وار، من ده انسانام

ديليم وار، خلقيم وار، يوردوم يووام وار

يئردن چيخماميشام گوبه لك كيمي

آدامام، حقيم وار، ائليم اوبام وار

قول يارانماميشام،ياراناندا من

هئچ كسه اولمارام، نه قول، نه اسير

قورتولوش عصريدير انسانا بو عصر

اسير اولانلاردا بوخوون كسير.

من او پروانه يم كي حيات آدلي بير شعله يه وورولموشام

يانسامدا قورخوم يوخدور

ازلدن بو سئودا دا يانماقا دوغولموشام